अमरावतीतून अपहरण झालेल्या बालकाला आमगावात डांबून ठेवल्याचे उघड; पूजासाहित्यामुळे संशयाचे गूढ वाढले!

आमगाव पोलिसांच्या तपासात बालकाचा शोध; अपहरणामागील नेमके कारण अद्याप अस्पष्ट — राजापेठ पोलिसांकडून सखोल तपासाची मागणी

आमगाव : अमरावती येथून एका पाच वर्षीय बालकाचे अपहरण करून त्याला आमगाव येथे एका कुटुंबाच्या घरात डांबून ठेवल्याची घटना समोर आली असून, या प्रकरणामुळे परिसरात खळबळ उडाली आहे. अमरावती क्राइम ब्रँचच्या माध्यमातून मिळालेल्या माहितीच्या आधारे आमगाव पोलिसांनी केलेल्या तपासात बालकाचा शोध लागला. मात्र, बालकाचे अपहरण नेमके कोणत्या उद्देशाने करण्यात आले होते, याबाबत अद्याप स्पष्ट माहिती समोर आलेली नसल्याने अनेक प्रश्न उपस्थित होत आहेत.

आमगाव पोलिसांच्या कारवाईत बालकाचा शोध

दिनांक १९ ऑक्टोबर २०२६ रोजी अमरावती क्राइम ब्रँचकडून आमगावचे पोलीस निरीक्षक यांना माहिती मिळाली की, अमरावती येथून अपहरण करण्यात आलेला पाच वर्षीय बालक आमगाव पोलीस ठाण्याच्या हद्दीतील रामचरण गुप्ता यांच्या घरात असल्याची शक्यता आहे. ही माहिती मिळताच आमगाव पोलिसांनी स्थानिक डीबी पथकाला तपासासाठी रवाना केले. पोलीस निरीक्षक नीलकंठ कुकडे यांच्या मार्गदर्शनाखाली पोलिसांनी बालकाचा शोध घेण्याची मोहीम हाती घेतली.

तपासादरम्यान संबंधित घराचा शोध घेतला असता, घरामध्ये बेडरूममध्ये झोपलेल्या अवस्थेत पाच वर्षीय बालक आढळून आल्याचे पोलिसांच्या प्रसिद्धिपत्रकात नमूद करण्यात आले आहे. बालकाची ओळख पटविण्यासाठी त्याचे छायाचित्र अमरावती येथील तपास पथकाकडे पाठविण्यात आले. त्यानंतर संबंधित बालक हाच अपहरण झालेला मुलगा असल्याची खात्री करण्यात आली. पुढील कारवाईसाठी बालकाला अमरावती येथील गुन्हे शाखेच्या पथकाच्या ताब्यात देण्यात आल्याची माहिती प्रसिद्धिपत्रकातून समोर आली आहे.

घरातील पूजासाहित्यामुळे चर्चेला उधाण

या प्रकरणात बालकाचा शोध घेताना संबंधित ठिकाणी पूजासाहित्य आढळल्याचा दावा स्थानिक पातळीवर केला जात आहे. त्यामुळे बालकाला नेमक्या कोणत्या कारणासाठी तेथे ठेवण्यात आले होते, याबाबत नागरिकांमध्ये चर्चा सुरू झाली आहे. काही नागरिकांकडून या घटनेमागे अंधश्रद्धा किंवा तथाकथित बुवाबाजीशी संबंधित काही बाबी आहेत का, असा संशय व्यक्त केला जात आहे.

मात्र, घरात पूजासाहित्य आढळणे एवढ्याच कारणावरून अपहरणाचा उद्देश नरबळी किंवा अन्य कोणत्याही अनिष्ट प्रकाराशी संबंधित होता का ? , याबाबद स्पष्टता समोर आली नाही.या दिशेने प्रकरणातील प्रत्येक बाबीची निष्पक्ष तपासणी होणे आवश्यक आहे.

अपहरणामागील उद्देश काय? अनेक प्रश्न अनुत्तरित

अमरावती येथून अपहरण करण्यात आलेल्या बालकाला आमगाव परिसरात आणून दुसऱ्या ठिकाणी ठेवण्यामागील नेमका उद्देश काय होता, संबंधित व्यक्तींचा बालकाशी काय संबंध होता आणि या प्रकरणात आणखी कोणाचा सहभाग आहे का, असे अनेक प्रश्न उपस्थित होत आहेत. बालकाला सुरक्षितपणे ताब्यात घेण्यात आले असले, तरी अपहरणामागील कारण स्पष्ट होणे आणि संभाव्य सहभागी व्यक्तींची भूमिका तपासातून निश्चित होणे महत्त्वाचे आहे.

विशेषतः संबंधित ठिकाणी आढळलेल्या पूजासाहित्याची पार्श्वभूमी, बालकाला तेथे किती काळ ठेवण्यात आले होते, त्याच्यासोबत कोणताही अनुचित प्रकार घडला होता का आणि त्याला आमगाव परिसरात आणण्यामागील कारण काय होते, या सर्व बाबींचा तपास होणे गरजेचे आहे. या प्रश्नांची उत्तरे केवळ सखोल चौकशी आणि उपलब्ध पुराव्यांच्या वैज्ञानिक तपासणीतूनच मिळू शकतील. करिता तपासाला गती देण्याची मागणी पुढे येत आहे.

राजापेठ पोलिसांकडून सखोल तपासाची मागणी

अमरावती शहरातील राजापेठ पोलीस ठाण्यात या प्रकरणी अप क्रमांक ९०२/२०२६ नुसार गुन्हा दाखल असल्याचे प्रसिद्धिपत्रकात नमूद आहे. या गुन्ह्याचा तपास राजापेठ पोलीस ठाण्याकडून सुरू आहे. त्यामुळे तपास अधिकाऱ्यांनी बालकाच्या अपहरणामागील नेमका उद्देश, संबंधित व्यक्तींची भूमिका, घटनास्थळावरील वस्तूंचे महत्त्व आणि संभाव्य अन्य आरोपींचा सहभाग यांचा सखोल तपास करावा, अशी मागणी स्थानिक नागरिकांकडून होत आहे.

बालकांच्या सुरक्षेचा प्रश्न अत्यंत संवेदनशील असल्याने या प्रकरणातील सत्य लवकरात लवकर समोर आणणे आवश्यक आहे. अफवा किंवा अप्रमाणित संशयांना बळी न पडता पोलिसांनी सर्व पुराव्यांच्या आधारे तपास पूर्ण करावा आणि दोषी आढळणाऱ्यांवर कायद्यानुसार कठोर कारवाई करावी, अशी अपेक्षा व्यक्त केली जात आहे.

आता सर्वांचे लक्ष राजापेठ पोलिसांच्या तपासाकडे

आमगाव पोलिसांच्या तत्पर कारवाईमुळे अपहरण झालेल्या बालकाचा शोध लागला; मात्र या घटनेमागील संपूर्ण सत्य अद्याप स्पष्ट व्हायचे आहे. पूजासाहित्य आढळल्याच्या चर्चेपासून ते बालकाला आमगाव परिसरात आणण्यामागील कारणापर्यंत प्रत्येक बाबीची पडताळणी होणे आवश्यक आहे. त्यामुळे राजापेठ पोलिसांचा पुढील तपास या प्रकरणातील गूढ उकलण्यासाठी निर्णायक ठरणार आहे. आमगाव येथे तपास कार्यात पोलीस उपनिरिक्षक अतुल कोलते सह पोलिस कर्मचारी यांनी सहकार्य केले.